Tímamót

FÖGNUM TILVERUNNI Á KROSSGÖTUM LÍFSINS

Einstök augnablik!

Athafnirnar mínar eru:

Persónulegar

Fyrir hverja athöfn sest ég niður með ykkur og fæ að heyra ykkar persónulegu sögu. Afraksturinn úr því samtali verður svo aðaluppistaða athafnarinnar, sem verður því alveg einstök.

Líflegar

Gleði og húmor eru hornsteinninn í athöfnunum mínum. Lífið er skemmtilegt og þessi tímamót eiga að vera hamingjuríkar stundir sem koma fólki til að hlæja og gráta. Hvað er annars ekki fyndið við svaramanninn sem gleymir hringunum eða ungabarnið sem prumpar í miðri athöfn?

Hátíðlegar

Athafnirnar mínar eru sjaldnast mjög alvarlegar, en þær eru hinsvegar alltaf hátíðlegar. Hátíðleikinn felst í hefðunum og þeirri virðingu sem við sýnum litla barninu eða ástfangna parinu með því að fagna með þeim.

Húmanískar

Athafnirnar mínar eru trúarlega hlutlausar og henta því bæði trúlausum sem trúuðum, en meginkjarninn í boðskapnum er húmanísk lífssýn. Húmanistar aðhyllast vísindalega skynsemishyggju og tala fyrir frjálsri hugsun og siðrænu samfélagi.

Hjónavígslur

Fannstu lífsförunautinn? Þá gæti vel verið að þú viljir ganga í hjónaband! Hjónavígsluathafnirnar sem ég stýri eru einlægar, persónulegar og byggðar á sögu ykkar sem pars. Þær eru táknrænar athafnir sem heiðra ástina, sambandið og lífið. Þær uppfylla öll lagaleg skilyrði og svo eru þær náttúrulega bara stórgóð afsökun til að halda lítið eða stórt – en alltaf mjög gott – partý!

LESTU MEIRA UM HJÓNAVÍGSLUR

Nafngjafir

Hvað á barnið að heita? Það er ógleymanlegt að fá lítið barn í hendurnar, sem á heiminn að fótum sér. Það þarf svo sannarlega að halda upp á tilveru þessa nýja jarðarbúa og það er hægt að gera með nafngjafarathöfn, þar sem barnið er boðið velkomið og því gefið formlega nafn. Nafngjafarathafnir henta bæði fyrir börn sem hafa ekki fengið opinbert nafn ennþá og fyrir börn sem hafa þegar fengið nafn sem hefur verið tilkynnt.

LESTU MEIRA UM NAFNGJAFARATHAFNIR

Hver er ég?

Ég er skoðanaglöð og skemmtileg. Ég er skipulögð og óskipulögð. Ég er tónelsk og listhneigð og kann alla textana í RENT utan að. Ég stressast upp ef ég sé fram á að þurfa að labba heim hljóðbókarlaus. Ég er húmanisti.

***

Ég er týpan sem grenjar yfirfantasíubókum. Ég er samfélagsþenkjandi skáti sem brennur fyrir jafnaðarmennsku. Ég er húmanisti.

***

Ég er mamma hans Starra og ég er hinsegin. Ég er femínistinn sem tekur sjaldan niður kynjagleraugun. Ég er skapandi verkefnastjóri. Ég er athafnarstjóri og Siðmenntarformaður. Ég er húmanisti.

Siðmennt

Félag siðrænna húmanista á Íslandi

Allar athafnir sem ég stýri eru fyrir hönd Siðmenntar – félags siðrænna húmanista á Íslandi. Það þýðir að allar athafnir eru bókaðar í gegnum Siðmennt og gjaldskráin mín fylgir gjaldskrá félagsins.

Lífsskoðunarfélagið Siðmennt var stofnað árið 1990 og byggir starf sitt á húmanískri lífssýn, með trúfrelsi, manngildi og mannréttindi sem sitt leiðarljós. Félagið þjónustar fólk á tímamótum lífsins og býður upp á giftingar, nafngjafir, fermingar og útfarir, ásamt því að standa fyrir viðburðum og halda úti húmanísku viðbragðsteymi.

Vefur Siðmenntar

Stendur þú á krossgötum?

Heyrðu þá í mér!

Ert þú að skipuleggja giftingu? Eða varstu að eignast barn? Ef þú heldur að við eigum samleið, þá skaltu ekki hika við að heyra í mér varðandi dagsetningar, upplýsingar eða hugmyndir.

Netfangið mitt er inga@sidmennt.is