Hvaða pappíra þarf ég til að gifta mig?
Þú þarft að framvísa eftirfarandi gögnum, samkvæmt reglugerð 55/2013 frá Innanríkisráðuneytinu til þess að athafnarstjórinn (eða sýslumaður, presturinn, goðinn, imaminn, rabbíninn, zúíski galdralæknirinn) megi gifta þig:
- Fæðingarvottorð.
- Hjúskaparstöðuvottorð
- Persónuskilríki
Fæðingarvottorð
Hvað er fæðingarvottorð?
Fæðingarvottorð er pappír sem segir til um það hvar og hvenær þú fæddist, hverjir foreldrar þínir séu og svo framvegis. Ef þú fæddist á Íslandi geturðu fengið fæðingarvottorð hjá Þjóðskrá. Ef þú fæddist í útlöndum þarftu að fá fæðingarvottorð frá landinu sem þú fæddist í. Í slíkum tilvikum er best að hafa samband við þjónustuver Þjóðskrár í síma 515 5300.
Hvar fæ ég fæðingarvottorð?
Kannski áttu það frá því í gamla daga og það er allt í lagi. Ef ekki, þá þarftu að sækja um slíkt hjá Þjóðskrá. Það gerir þú hér. Þú þarft Íslykil eða rafræn skilríki til að skrá þig inn.
Hvað má það vera gamalt?
Alveg glænýtt eða jafngamalt og þú!
Hvað kostar það?
2.550 kr. stykkið (og þið þurfið bæði svoleiðis).
Hver er afgreiðslutíminn?
Allt að 4 virkir dagar og þú getur annað hvort sótt í afgreiðslu eða fengið sent heim til þín.
Get ég sótt um það fyrir makann minn?
Já, ef þið eruð skráð í sambúð.
Ertu alveg viss? Presturinn minn bað ekki um það!?
Samkvæmt reglugerð á fulltrúi trúfélags/lífsskoðunarfélags að biðja um það, þannig að væntanlega er þá viðkomandi eitthvað aðeins að fara á svig við lögin (sennilega af góðum hug til að spara þér pening). Auðvitað á eitt yfir alla að ganga, en endilega treystu þá bara þeim sem gefur ykkur saman og farðu eftir leiðbeiningum frá háni.
Hjúskaparstöðuvottorð
Hvað er hjúskaparstöðuvottorð?
Hjúskaparstöðuvottorð er vottorð sem sannar að þú sért ekki í hjónabandi núþegar, eða að þú sért búin(n) að skilja ef þú varst einhverntímann áður í hjónabandi.
Hvar fæ ég hjúskaparstöðuvottorð?
Þú þarft að sækja um svoleiðis hjá Þjóðskrá. Það geturðu gert hér. Þú þarft Íslykil eða rafræn skilríki til að sækja um vottorðið.
Hvað má það vera gamalt?
Hjúskaparstöðuvottorðið má vera 8 vikna þegar fulltrúi trúfélags/lífsskoðunarfélags kvittar undir svokallað könnunarvottorð. Það er því fínt að sækja um það svona mánuði fyrir brúðkaupsdaginn, eða fara bara eftir leiðbeiningum prestsins/athafnarstjórans/goðans/imamsins/rabbínans!
Hver er afgreiðslutíminn?
Hann er allt að 4 virkir dagar. Ef þú gleymdir þér og ert í tímaþröng, þá skaltu ekki láta senda pappírana heim til þín heldur sækja sjálf(ur/t) til Þjóðskrá.
Hvað kostar það?
2.550 kr. stykkið (og þið þurfið bæði svoleiðis).
Get ég sótt um það fyrir makann minn?
Já, ef þið eruð skráð í sambúð.
Persónuskilríki
Persónuskilríki með nafni hjónaefnis, ljósmynd og fæðingardegi til sönnunar, svo sem vegabréf, ökuskírteini eða nafnskírteini. Þetta þarftu að mæta með á fundinn með fulltrúa trúfélagsins/lífskoðunarfélagsins eða sýslumanni. Kannski tekur viðkomandi ljósmynd eða ljósrit.
Þessi færsla birtist fyrst á facebookhópnum Brúðkaups hugmyndir, en er að öllu leyti skrifuð af mér.
